Шекеринска и Апостолакис потпишаа Договор за одбранбена соработка – се гради стратешко партнерство

Министерката за одбрана на Република Северна Македонија, Радмила Шекеринска, денеска имаше билатерална средба со министерот за национална одбрана, Евангелос Апостолакис, дел од високата грчка делегација, предводена од премиерот Алексис Ципрас, кој е во официјална посета на нашата држава.

Министерката Шекеринска и министерот Апостолакис потпишаа и нов сеопфатен Договор за соработка во одбраната, 20 години по потпишувањето на првиот Договор за соработка од овој тип.

„Денеска сме сведоци на огромен чекор напред во зацврстувањето на соработката во одбраната меѓу Северна Македонија и Грција. Иницијативата за потпишувањето на Договорот произлезе нашата прва министерска средба на 13 февруари во Брисел. Од нашиот прв состанок зборуваме со еднаква посветеност суштински да ја засилиме соработката во одбраната, да покажеме дека сојузништвото во НАТО кон кое нè води Преспанскиот договор е исклучиво во интерес на граѓаните на двете земји. Договорот за соработка во одбраната ја покажува нашата посветеност за соработка“, рече министерката на заедничкиот состанок на двете делегации.

Министерот Апостолакис потенцираше дека неговата денешна посета на нашата земја како дел од грчката официјална делегација предводена од премиерот Ципрас, претставува печат на силната волја да се засили и прошири билатералната соработка и да се подигне на ниво на стратешко партнерство во областа на одбраната. Тој рече дека двете земји ја пратиле пораката на помирување и соработка.

„Договорот за соработка во одбраната што го потпишавме е јасен доказ за нашата силна намера да отвориме нова ера во билатералната одбранбена соработка меѓу двете Армии“, рече Апостолакис и потенцираше дека тој и министерката Шекеринска имаат еднаква решеност соработката што поскоро да покаже резултати.

Во договорот се наведени областите на соработка од взаемен интерес – стратешки дијалог, одбранбената политика и доктрини, развој на одбранбените способности, одбранбеното планирање, логистиката, воената медицина , военото образование…

Министрите Шекеринска и Апостолакис заклучија дека денешната средба и новиот Договор за одбранбена соработка се исклучителна можност за нова стратегиска соработка на билатерален, регионален план, но и како сојузници, во рамки на НАТО – Алијансата.

Во рамки на посетата, министрите Шекеринска и Апостолакис ги посетија воените оркестри на двете земји кои се подготвуваат за заедничкиот концерт на 5 Армии кој ќе се одржи во рамките на одбележувањето на НАТО неделата, во Скопје.

facebooktwittergoogle_plusredditpinterestlinkedintumblrmail