Шекеринска од Атлетската трка во Скопје: Трчаме заедно кон целта – НАТО, беше тешко, но успеавме

Денеска во Градскиот парк се одржа НАТО – Атлетска трка, организирана од Министерството за одбрана, Армијата, Евроатлантскиот Совет и Атлетската федерација, по повод Неделата на НАТО и 70-годишнината од основањето на Алијансата.

Заедно со граѓаните, на трката учествуваше и министерката за одбрана, Радмила Шекеринска, началникот на Генералштабот на Армијата, генералот Васко Ѓурчиновски, евро-амбасадорот Самуел Жбогар, шефот на Канцеларијата на НАТО во Скопје, полковникот Јанковиќ, припадници на Армијата и Министерството за одбрана.

„Денеска и симболично покажавме дека сиве овие години трчавме кон нашата заедничка цел – а, тоа е НАТО-членството и таа трка беше за жал потешка од денешната. Таа траеше подолго време и таа бараше многу напори и одрекување. Меѓутоа нашата држава стигна до целта. Покажавме дека сите сме обединети во желбата нашата земја да стане подобра, да стане побезбедна, да стане попросперитетна. Затоа, трчавме кон НАТО и заради големиот напор и големата енергија , успеавме во оваа цел“, рече министерката Шекеринска.

Трката ја отвори шефот на Канцеларијата за врски на НАТО, Зоран Јанковиќ, кој изрази убедување дека нашата држава наскоро ќе биде 30. земја-членка на Алијансата.

260 натпреварувачи трчаа на патеките од три и од пет километри. Најдобрите тројца учесници од трката на 3 и од трката на 5 километри ќе бидат наградени со учество на меѓународен маратон надвор од државата. Победниците ќе бидат прогласени на утрешниот отворен ден на Армијата, во Градскиот парк во Скопје, кај Школка.

facebooktwittergoogle_plusredditpinterestlinkedintumblrmail