Solidariteti i Aleatëve në vepër – pranohet donacioni i NATO-s prej 60 respiratorë me vlerë 1.4 milion euro

Sot në Aeroportin Ndërkombëtar të Shkupit mbërriti donacioni i 60 respiratorëve për transport nga Fondi i NATO-s për Reagim ndaj Pandemisë, vlera totale e të cilave është 1.4 milion euro.

Në ceremoninë e dorëzimit morën pjesë ministrja e mbrojtjes Radmilla Shekerinska, ministrat e Punëve të Jashtme dhe Shëndetësisë Bujar Osmani dhe Venko Filipçe, shefi i Zyrës Ndërlidhëse të NATO-s në Shkup, kolonel Zoran Jankoviq, zëvendës ambasadori italian Alessandro Alessa, kolonel Xhusepe Montalto si dhe drejtori i Qendrës për Menaxhimin e Krizave Agron Buxhaku.

Ministrja Shekerinska theksoi se kjo ndihmë shtesë mjekësore e paralajmëruar nga Sekretari i Përgjithshëm i NATO-s në fillim të muajit do të thotë ndihmë e drejtpërdrejtë për vendin tonë me pajisje që janë të rëndësishme në këtë krizë shëndetësore.

,, Bëhet fjalë për fonde në vlerë prej mbi 1.4 milion euro, të cilat janë dhuruar nga USAID dhe janë pjesë e rezervave të NATO-s të pajisjeve mjekësore të vendosura në Itali, ndërsa arritën këtu me aeroplan me Forcat Ajrore Italiane, që u financua nga Luksemburgu “Kjo do të thotë që disa shtete anëtare të NATO-s kanë punuar së bashku brenda Aleancës për të marrë ndihmë kur kemi më shumë nevojë”, tha ministrja Shekerinska. Ajo shtoi se anëtarësimi në aleancën më të fuqishme ushtarako-politike do të thotë që kur të kesh problemet më të mëdha, do të kesh ku të mbështetesh.

Ministrja tha se sot mund të shohim pse ishte shumë e rëndësishme që Republika e Maqedonisë së Veriut të bëhej anëtare e NATO-s dhe të shihnim se si kjo aleancë ushtarako-politike, më e fuqishmja sot, nënkupton solidaritet, jo vetëm me fjalë, por edhe me solidaritet në vepër.

Ministri i Punëve të Jashtme, Osmani, falënderoi për donacionin dhe theksoi se mbështetja e NATO-s është jashtëzakonisht e rëndësishme për ne si një anëtare e re e plotë e Aleancës më të fortë në botë.
„Koronavirusi është këtu dhe është më i rrezikshëm se kurrë. Këto janë kohë të vështira kur ndihma e miqve tanë është më se e mirëpritur – ajo është e domosdoshme. Falënderime të sinqerta për vendet anëtare të NATO-s, për Sekretariatin e NATO-s, për këtë ndihmë konkrete që morëm sot – një donacion i mirë-shënjestruar, në kohë dhe siç e thashë – e domosdoshme për ne për të forcuar kapacitetin tonë në luftën kundër KOVID 19 “, theksoi Osmani, duke shtuar se donacioni i sotëm nuk është i pari.

„Ne jemi një anëtar i plotë i NATO-s dhe kjo pasqyrohet në përfshirjen tonë në të gjithë mekanizmat dhe fondet për trajtimin e pandemisë së virusit KOVID-19. “Kjo është hera e dytë që Republika e Maqedonisë së Veriut merr ndihmë përmes Qendrës Koordinuese të NATO-s për Reagim ndaj Krizave,” tha ministri Osmani.

Ministri Filipçe tha se simboli i kësaj krize shëndetësore është solidariteti. Ai tha se të gjitha vendet i kanë treguar njëri-tjetrit se çfarë do të thotë të ndihmosh, të ndash përvojat, njohuritë, por gjithashtu tregoi vlerën e vërtetë të aleancave në të cilat tani jemi anëtarë të barabartë.

„Më lejoni të shpreh mirënjohjen time për aleancën e NATO-s, veçanërisht Shtetet e Bashkuara, të cilat që nga fillimi i krizës kanë dhuruar pajisje mbrojtëse dhe mjekësore pa të cilat do të ishte vërtet e vështirë për ne të menaxhonim këtë sfidë të madhe shëndetësore, këtë krizë të madhe shëndetësore. “Në mënyrë të veçantë, është një dhurim i aparateve të frymëmarrjes që përdoren për të transportuar pacientë në ambulanca nga një spital në tjetrin – diçka që do të forcojë ndjeshëm sistemin tonë shëndetësor në këtë segment,” tha Filipçe.

facebooktwittergoogle_plusredditpinterestlinkedintumblrmail